قطعت عنه المعونه حكايات صافي هاني

طليقي كان واقف قدام المحكمة بابتسامة صفرا كلها غندرة، وبيعرض عليا 25 ألف دولار بعد خمس سنين جواز. ابتسمتله ببرود، ولغيت مصاريف جامعتها في كاليفورنيا اللي داخلة في 150 ألف دولار، وسبت ماري تضرب أخماس في أسداس لما كروتها وقفت فجأة وهي بتشتري من براند كبير. بيتر كان فاكر إني هطلع من المولد بلا حمص. بس اللي مايعرفوش إني كنت خلاص وقفت الحنفية عن عيلته كلها. في نفس اللحظة اللي ورق الطلاق اتختم فيها، قطعت كل مليم كان بيروح لأخته. مش بعد الضهر.. ولا لما أرجع البيت.. في ساعتها. بعد دقيقة واحدة من ختم الموظف على الورق، نزلت على سلم المحكمة، طلعت تليفوني وعملت مكالمة واحدة. قلت لمساعدي أول ما رد: "يا رامي، الغي أي مصاريف أو فلوس مربوطة بماري." سكت ثانية وقال: "كلها يا فندم؟ المصاريف، الإيجار، الفيزا، كله؟" قلتله: "كله.. ومن دلوقتي حالا." قال لي: "تمام يا فندم، حصل." قفلت السكة وبصيت على الورق اللي في إيدي. شمس الصيف كانت حامية على سلم المحكمة، بس جوايا كان فيه هدوء تام. لا غل.. ولا حزن.. عقلي بس كان صافي تماماً. أنا اسمي كلارا، وعشت خمس سنين متجوزة راجل كان فاكر سكوتي قلة حيلة أو غباء. بيتر كان واقف قريّب مني ببدلته الكحلي المتفصلة جاهز، بيظبط أساور قميصه وكأنه لسه مخلص صفقة عمره الكسبانة. بصلي بابتسامة رضا وقال: "كلارا.. أخيراً عقلتي واخترتي الصح." بصيتله ومردتش. ده نفس الراجل اللي شيلته في أزماته المالية، وديونه المستخبية، ومصايبه اللي كانت بتطلع نص الليل. نفس الراجل اللي كان بيسمي ده "مشاركة" وأنا بدفع في صمت وهو بياخد اللقطة والمدح قدام الناس. كمل كلامه: "كان المفروض تمضي من بدري.. بس يلا، المهم إننا خلصنا." وبرضه مردتش. عشان السكوت مش دايماً معناه هزيمة. ساعات بيكون هو قمة التحكم والسيطرة. ضحكته وسعت أكتر وقال: "رغم إنك خارجة من ايد ورا وايد قدام، أنا هبعتلك 25 ألف دولار.. اعتبريهم مكافأة نهاية الخدمة عن الخمس سنين دول." خمسة وعشرين ألف! قصاد خمس سنين شايلاه فيهم على كتافي. ضحكت ضحكة خطفتها بسرعة وقلت في سر صمتي: "لو كنت أنا بتاعة زمان، كان الكلام ده ممكن يوجعني." ابتسامته اختفت وقال: "وقصدك إيه بقى بالكلام ده؟" بصيت لورق الطلاق وقلتله: "خليني أسألك سؤال يا بيتر.. جامعة ماري في كاليفورنيا بتتكلف أكتر من 150 ألف دولار في السنة، تعرف مين كان بيدفعهم؟" كشر وهز راسه بضحكة ماليها الاستهزاء: "دي كانت فلوس الشركة." بصيت في ساعتي.. رامي زمانه قفل كل المحابس. قلتله: "لأ.. في 2020 لما شركتك مكنتش ملاحقة تغطي المصاريف، أنا حولت 80 ألف دولار من حسابي الشخصي." ملامحه اتشدت واتغيرت. كملت: "وعلى مدار التلات سنين اللي بعدهم، كنت بغطي أكتر من 150 ألف دولار في السنة.. مصاريف جامعة، إيجار، مصاريف معيشة، كله من طقطق للسلام عليكم." زعق وقالي: "أنتي كدابة!" قلتله ببرود: "تحب تشوف الإثباتات؟" هنا كانت أول هزة في ثقته بنفسه. وزودت عليها: "والسنة اللي فاتت، لما ماري كانت عايزة عربية جديدة، أنا اللي بعتتلها 60 ألف دولار." صوته بدأ يتهز ويهبط وهو بيقول: "دي كانت فلوس الشغل." ابتسمت وقلتله: "دي كانت فلوسي أنا." ولأول مرة، بيتر ملقاش كلمة ينطق بيها. في اللحظة دي تليفوني رن. رديت وفتحت السبيكر. ماري كانت بتصرخ: "كلارا! هي الكروت بتاعتي مش شغالين ليه؟ أنا واقفة في المحل والناس كلها بتبص عليا!" ماري.. عندها 22 سنة، عايشة في كاليفورنيا، وراكبة عربية أنا اللي شارياها، وبتصرف من فلوس أنا اللي مطلعاها.. ولسه بتتكلم وكأن ليها حق عندي. قلتلها بكل برود: "يا ماري، من هنا ورايح لازم تدبري مصاريفك بنفسك." قالت بصدمة: "إيه؟" قلت: "أنا مابقتش مسؤولة عن مصاريفك خلاص." سكتت لحظة من الصدمة، وبعدها اتحولت لغل: "أنتي مفيش في إيدك تعملي كده! أنا ورايا جامعة! وكنت لسه هشتري حاجة—" قفلت السكة في وشها. وش بيتر بقى دم من كتر العصبية. وزعق: "صلحي الهباب ده.. رجعي كل حاجة زي ما كانت." ميلت راسي وبصيتله: "دي أختك أنت.. اصرف عليها أنت." الكلمات طلعت هادية.. بس نزلت عليه زي الصاعقة. لأننا إحنا الاتنين عارفين البير وغطاه. شركته مكنتش قوية ولا حاجة. دي كانت بتنازع وبتطلع في الروح.. وفلوسي أنا اللي كانت مسنداها وموقفاها على رجليها. ومن غيري، كل حاجة هتقع وهتتفركش. تليفونه رن.. كانت والدته. بص للشاشة.. وكنسل عليها.. وبعدها عملها بلوك. كنت هبتسم من منظره. زعق فيا وهو مضغوط: "أنتي اتجننتي! أنتي قاصدة تخربي بيتي وتدمري عيلتي." قربت منه خطوة وقلتله: "أدمر؟ السنة اللي فاتت، لما كنت بتبعتلي ناس تضغط عليا عشان أمضي ورق الطلاق ده، كنت بتفكر في الدمار ساعتها؟" عينه زاغت في الأرض ثانية واحدة.. بس كانت كفاية تفضح كل حاجة. قلتله بصوت واطي: "أنا كنت عارفة أكتر بكتير ملي كنت تتخيله.. أنا بس كنت بديك وقت." سكت ثانية وكملت: "بس الطبع غلاب، وفيه ناس عمرها ما بتتغير." لفيت وضهري عشان أمشي. سمعته بيزعق ورايا: "هتندمي على اللي عملتيه ده!" مبصيتش ورايا حتى، وقلتله: "متقلقش.. بكرة هيكون أسوأ بكتير." عربية سودا فخمة وقفت قدامي، السواق بتاعي نزل وفتحلي الباب وقال: "يا فندم، اتفضلي يا كلارا هانم." ركبت من غير أي تردد. وفي المراية، شفت بيتر واقف على سلم المحكمة، وكل الوش الخشب والثقة اللي كانت عليه بتتبخر وبوشه بيتقلب لحاجة تانية خالص.. الرعب. مكانش عنده أدنى فكرة إن اللي خسره دلوقتي ده مجرد البداية بس.. ومكانش يعرف اصلاً هو كان بيلعب مع مين طول السنين دي. وبعدها بأسبوعين بالظبط، كنت قاعدة في مكتبي في الشركة باخد قهوة الصبح، لما السكرتيرة دخلت وقالت لي بصوت واطي: "كلارا هانم.. بيتر بره في الاستقبال، وشكله مبهدل خالص وطالب يقابل حضرتك بأي طريقة.. نطلبه الأمن؟" نزلت فنجان القهوة من إيدي وبصيت من الشباك الإزاز، وقلت لها: "لأ، دخليه.. بس سيبيلنا الباب موارب." دخل بيتر، بس مكانش بيتر بتاع زمان.. البدلة الكحلي الغالية كانت مكرمشة، وعينيه كان تحتها هالات سودا، والغرور اللي كان مالي وشه على سلم المحكمة اتبخر تماما. قعد على الكرسي من غير ما يستأذن، وحط إيده على راسو وقال بصوت مخنوق: "كلارا.. أرجوكي، إحنا لازم نتكلم." بصيتله ببرود ومردتش، فكمل كلامه بسرعة وكأنه خايف أقاطعه: "الشركة بتقع.. البنوك رفضت تجدد القروض لما عرفوا إنك سحبتي ضمانتك المالية، والشيكات بدأت ترتد.. وأمي مش متبطلة عياط وماري طردوها من السكن في كاليفورنيا وراجعة في أول طيارة.. أنتي كده بتدمريني بجد!" سندت ضهري على الكرسي، وشبكت صوابعي وقلتله بكل هدوء: "أنا مابدمّركش يا بيتر.. أنا بس سيبتك تعتمد على نفسك.. مش ده اللي كنت بتسميه 'شغلك ومجهودك'؟ وريني بقى مجهودك هيعمل إيه." قام وقف وعينيه مليانة غل على عجز: "أنتي كنتِ بتخططي لده من زمان! كنتِ عارفة إن السند ده لما يتشال هقع." قمت وقفت أنا كمان، وقربت منه وقلتله بلهجة حاسمة: "أنا شيلتك خمس سنين على كتافي، وكنت مستعدة أشيلك العمر كله لو كنت صنت العشرة.. بس أنت افتكرت كرمي معاك مغفلة، وافتكرت سكوتي ضعف.. الفلوس اللي كنت بتفشخر بيها قدام الناس دي فلوس 'كلارا هانم'.. ودلوقتي، كل واحد يرجع لحجمه الطبيعي." بصلي وهو مش قادر ينطق، وعرف إن مفيش مفر. شاورتله على الباب وقلتله: "المقابلة انتهت يا بيتر.. وعندي اجتماع مهم.. اتفضل وريني هتحل مشاكلك 'العصامية' دي إزاي." لف وضهره وخرج وهو بيجر رجليه، وأنا رجعت قعدت، أخدت بؤ من القهوة، وبصيت لشغل الشركات الجديد اللي قدامي.. وأنا عارفة إن اللي جاي في حياتي هيكون أحسن بكتير، وأن صفحته اتقفلت للأبد. عدى شهرين، وفي يوم وأنا بتابع أخبار السوق والبورصة، لقيت اسم شركة بيتر نازل في النشرات الإخبارية للاقتصاد.. الشركة أعلنت إفلاسها رسميًا، والمعارض بتاعته اتقفلت بالشمع الأحمر بسبب الديون المتلتلة. تليفوني رن، وكان الرقم غريب، بس رديت. "كلارا.. أرجوكي ما تقفليش." كان صوت حماتي السابقة، طنط ميرفت. صوتهما كان مكسور تماماً ومش باين منه أي أثر للمعايرة أو الفشخرة الكدابة اللي كانت بتعملها معايا زمان. قلت لها بهدوء: "أهلاً يا طنط.. خير؟" بدأت تعيط وقالت: "بيتر هيتحبس يا كلارا.. الشيكات اللي عليه ملهاش رصيد، وماري أخته قاعدة في البيت ليل نهار بتصرخ ومش مستوعبة إننا مابصيناش نملك حاجة.. إحنا بنتبهدل، وأنتي الوحيدة اللي تقدري تنقذينا.. لو مش عشان بيتر، عشان الخمس سنين اللي عشتيها معانا." أخدت نفس طويل وقلت لها بوضوح: "يا طنط ميرفت، الخمس سنين دول أنا كنت بدفع تمنهم غالي من كرامتي وأعصابي وفلوسي، وأظن إنكم أخدتوا تمنهم وزيادة.. بيتر هو اللي اختار ينهي كل حاجة بالطريقة دي وهو فاكر إنه كسبان.. أنا مش جمعية خيرية، ومش مسؤولة أصلح غلطات راجل مش عارف يدير حياته." وقبل ما تسمع ردها، قفلت السكة وعملت للرقم بلوك. في نفس اليوم بالليل، كنت معزومة في حفلة عشاء كبيرة لرجال وسيدات الأعمال. كنت لابسة فستان أسود أنيق، وواقفة بتكلم مع أكبر المستثمرين في البلد عن مشروع جديد هبدأ فيه الأسبوع الجاي. وأنا وسط الكلام والضحك، عيني جت على الشارع من ورا الإزاز الكبير بتاع القاعة.. شفت بيتر واقف بعيد، لابس لبس عادي جداً، وكان بيحاول يدخل الحفلة بس أفراد الأمن منعوه وطردوه بره لأن اسمه مش في كشف المعازيم. بصلي من بعيد.. عينه جت في عيني.. شفت في نظراته كمية ندم وحسرة تكفي بلد بحالها. عرف وقتها إن المكان اللي هو مطرود منه ده، هو المكان الطبيعي بتاعي أنا، وأنه لما خسرني.. ما خسرش مجرد ست كانت عايشة معاه، ده خسر السند والضهر والفرصة الوحيدة اللي كانت عامله قيمة وسط الناس. لفيت وشي عنه، ورفعت كاس العصير بتاعي، وكملت كلامي مع المستثمرين بابتسامة صافية. الحكاية مش حكاية فلوس.. الحكاية إنك لما تلاقي حد بيحبك ويشيلك في عينه، اوعى تفتكر إن سكوتة مغفلة.. عشان لما بيقرر يمشي، مابيرجعش يبص وراه تاني أبداً. بعد الحفلة دي بأسبوع، جالي إيميل من المحامي بتاعي بيبلغني إن إجراءات تصفية ممتلكات شركة بيتر تمت بالكامل عشان تسديد الديون، وإن البنك عرض المقر الرئيسي بتاع شركته القديمة في المزاد العلني. مكانش فيه أي تردد.. كلمت المحامي فوراً وقلتله: "اشتري المقر ده بأي تمن." وفعلاً، خلال أيام كانت الصفقة تمت، والمبنى اللي بيتر كان بيدخله زمان وهو فاكر نفسه ملك زمانه، بقى ملكي أنا.. ملك "كلارا ويتمور". رحت هناك الصبح ومعايا فريق مهندسين ديكور عشان نهد كل حاجة ونبدأ نجدد المكان من أول وجديد عشان يكون الفرع الرئيسي الجديد لشركتي. وأنا واقفة في المكتب الكبير اللي كان مكتب بيتر زمان، السواق بتاعي دخل وقال لي: "كلارا هانم، فيه واحدة بره على آخِرها وعايزة تدخل ومصممة.. بتقول إنها ماري." شاورتله يدخلها. دخلت ماري وشكلها كان يصعب على الكافر؛ مفيش بقى لبس البراندات ولا الفشخرة بتاعة كاليفورنيا، وشها كان باهت وشعرها منكوش، وبمجرد ما شافتني صرخت: "أنتي إيه؟ مابتشبعيش؟ أخدتي مننا كل حاجة.. حتى شركة أخويا جيتي اشتريتيها عشان تذلينا؟" بصيت لها من فوق لتحت بكل برود، وقعدت على طرف المكتب وقلت لها: "أولاً، أنا مشتريتهاش عشان أذلكم.. أنتوا أصغر بكتير من إني أفكر أذلكم. أنا اشتريتها لأنها أصل تجاري معروض في السوق، وأنا ست عمل وبشتري اللي يكسبني." قربت خطوة وهي بتعيط: "بيتر هيتحبس يا كلارا! المحامي بيقول إنه لو مدفعش الشيكات اللي عليه خلال 48 ساعة هيدخل السجن.. أرجوكي ساعدينا، دبريلنا المبلغ ده سلف وهنرجعهولك.. إحنا بنموت." وقفت وبصيت لها عين في عين وقلت لها بنبرة حاسمة زي السكينة: "ماري.. لما كنتي بتصرفي آلاف الدولارات في محلات كاليفورنيا من فيزتي الشخصية، عمرك سألتي نفسك الفلوس دي بتيجي منين؟ لما كنتي بتركبي عربية بـ 60 ألف دولار وأنا اللي دافعة تمنها، عمرك فكرتي تقوليلي شكراً؟ أنتي وأخوكي وأمك عشتوا سنين في خير واحدة كنتوا بتبصوا لها على إنها مجرد بنك متحرك ومغفلة. بيتر لبس في الحيط بسبب غباؤه وطمعه، وأنا مش هدفع مليم واحد عشان أطلعه من سجن هو اللي بنى حيطانه بنفسه." شاورت للأمن وقلت لهم: "خدوا الآنسة بره.. ومش عايزة أشوف وشها في أي مبنى تبع لشركاتي تاني." خرجت ماري وهي بتصرخ وتعيط، وأنا التفت للمهندس وقلتله بكل هدوء: "امسحوا الديكور ده كله.. مش عايزة أي أثر للمرحلة القديمة دي هنا.. ابدأوا هدوا من بكرة." وفعلاً، عدت الأيام، وبيتر أتحكم عليه بالسجن بسبب الشيكات اللي ملهاش رصيد، وعيلته رجعت لحجمها الحقيقي تحت خط الصفر.. بينما أنا، شركتي كبرت أكتر، واسمي بقى يهز السوق. الدرس اللي بيتر وعيلته اتعلموه كان غالي جداً.. إنك لما تيجى على الست اللي شالتك ورفعتك لفوق، افتكر دايماً إن الجاذبية هترجعك مكان ما كنت.. وأصعب طردة، هي لما تترمي برة حياة حد كان قادر يشتريك ويشتري عيلتك كلها، بس أنت اللي اخترت الرخص. مرت سنة كاملة على كل اللي حصل. وفي يوم الصبح، كنت راكبة عربيتي ورايحة الفرع الجديد اللي فتحته مكان شركة بيتر القديمة. المكان اتغير تماماً، بقى واجهة زجاجية ضخمة عليها اسم شركتي بينور، والموظفين داخلين وخارجين بكل نشاط ونظام. وأنا داخلة من الباب الرئيسي، لقيت زحمة وشوشرة قريبة من مكاتب خدمة العملاء. قربت بهدوء أشوف فيه إيه، فلقيت السكيورتي ماسك راجل هدومه قديمة ووشه دبلان، وبيحاول يخرجه بره وهو بيقوله: "يا أستاذ قُلنا لقاء الإدارة بمواعيد مسبقة، اتفضل بره من غير شوشرة." الراجل لف وشه.. وكان بيتر. كان لسه خارج من السجن بقاله كام يوم، باين عليه الخسسان، والكسرة هدت كتفه تماماً. أول ما عينه جت في عيني، السكيورتي سابه، وبيتر وقف مكانه مش قادر ينطق. شاورت للأمن يسيبوه، وقلتله بنبرة هادية وخالية من أي شماتة: "أهلاً يا بيتر.. حمد الله على سلامتك. خير، إيه اللي جابك هنا؟" بص حواليه على عظمة المكان، وبعدين بص في الأرض وقال بصوت مرعش: "الله يسلمك يا كلارا.. أنا.. أنا كنت جاي أدور على شغل. قدمت في شركات كتير بس أول ما بيعرفوا موضوع السجن والإفلاس بيقفلوا الباب في وشي. لما عرفت إنك فتحتي هنا.. جيت، يمكن تفتكريلي أي حاجة طيبة وتوافقي تشغليني.. حتى لو في الأرشيف أو الحسابات ورا." بصيتله لثواني، وافتكرت شكله من سنة بالظبط على سلم المحكمة وهو بيقولي "اعتبري الـ 25 ألف دولار مكافأة نهاية الخدمة". سبحان مغير الأحوال، الدنيا لفت ودورِت وخلته جاي يطلب شغل من الست اللي كان فاكر إنه سابها على الحديدة. أخدت نفس طويل وقلتله: "بيتر.. أنا مش هرفضك عشان بيننا مشاكل قديمة، أنا في الشغل بفصل تماماً. بس أنت كـ 'رجل أعمال' سابق، عارف كويس إن شركاتي قايمة على الأمانة والشفافية وإدارة المال الصح. وللأسف، السي في بتاعك في السوق دلوقتي بيقول إنك فشلت في إدارة شركتك وفلوس عيلتك، وفوق كل ده دخلت سجن في قضايا شيكات.. تفتكر شركة بالحجم ده، ينفع تأتمنك على حساباتها أو ورقها؟" كلامي كان زي السكينة، بارد وحقيقي ومفهوش غلطة. دموعه نزلت وقال: "يعني مفيش فايدة؟ مفيش أي فرصة تانية؟" قلتله: "الفرص التانية دي بنطلبها من ربنا يا بيتر.. مش من الناس اللي إحنا هدينا ثقتهم بإيدينا. اطلب شغل في مكان تاني محدش يعرف فيه تاريخك، وابدأ من الصفر بجد.. يمكن المرة دي تتعلم تبني نفسك بنفسك ومن غير ما تتسند على جيو ب غيرك." التفت للسكرتيرة وقلت لها: "طلعي لبيتر مكافأة مالية بسيطة من حافز الطوارئ بتاع الشركة.. كـ 'مساعدة' إنسانية يبدأ بيها حياته." بصيتله للمرة الأخيرة وقلت: "بالتوفيق يا بيتر." وديرت ضهري ومشيت في ممر شركتي، سامعة صوت خطواته وهو خارج بره المبنى.. ولأول مرة حسيت إن القصة دي اتقفلت بالضبة والمفتاح. الست مش ضعيفة، الست لما بتحب بتشيل وبتدعم وبتكبر اللي معاها لحد ما توصله للسما.. بس لما بتكتشف إنها كانت بتسقي أرض بور، بتعرف تسحب البساط في ثانية، وتسيب اللي افتخر بمالها.. يواجه الدنيا بحجمه الحقيقي. بعد الموقف ده، الحياه مشيت بسرعة الصاروخ. شركتي فتحت فرعين كمان بره مصر، واسمي بقيت أسمعه في كل برامج الاقتصاد كنموذج لـ "المرأة الحديدية" اللي بنت إمبراطورية من الصفر وحافظت عليها. وفي يوم، بعد حوالي سنتين من آخر مقابلة مع بيتر، كنت في المطار راجعة من رحلة عمل في دبي. وأنا واقفة مستنية الشنط بتاعتي، عيني لمحت بنت واقفة بعيد بتبيع في كشك صغير بتاع قهوة وسندوتشات في صالة المطار. الملامح مكانتش غريبة عليا.. قربت شوية، ولقيتها ماري. ماري اللي كانت بتصرف آلاف الدولارات في كاليفورنيا بصباعها الصغير، واقفة دلوقتي بزي الشغل، بتنضف المكنة وتصُب القهوة للمسافرين، وعلامات التعب والإرهاق باينة على وشها. أول ما لفت وشها وعينها جت في عيني، اتجمدت مكانها. شافتني وأنا لابسة لبس السفر الأنيق، وورايا السواق ماسك الشنط، وحواليا هيبة النجاح اللي مبقتش تفارقني. نزلت راسها في الأرض بسرعة، وبدأت تتحرك وتعمل نفسها مجمعة في الشغل عشان تتهرب من نظراتي. مشيت خطوتين ناحية الكشك بتاعها، ووقفت. هي رفعت راسها وبصتلي بخوف وكسوف، وكأنها مستنية إني أشمت فيها أو أسمعها كلمتين سم. بس أنا ابتسمت لها ابتسامة هادية جداً، وقلت لها: "لو سمحتِ.. واحد قهوة سادة." إيدها كانت بترتعش وهي بتعمل الفنجان. حطته قدامي بصوت واطي وقالت: "اتفضلي يا كلارا هانم." أخدت القهوة، وحطيت على الترابيزة مبلغ كبير "بقشيش"، وبصيت في عينيها وقلت لها: "الشغل مش عيب يا ماري.. العيب إن الواحد يعيش على قفا غيره ويفتكر إنه أحسن منهم. على الأقل دلوقتي، أنتي بتصرفي من عرق جبينك.. و ده أول طريق عشان تبقي بني آدمة بجد." بصتلي والدموع محبوسة في عينيها، وهزت راسها من غير ولا كلمة.. بس النظرة دي كان فيها احترام حقيقي، لأول مرة في حياتها. أخدت قهوتي ومشيت وأنا حاسة براحة نفسية تامة. بيتر وعيلته مكانوش ناس أشرار في فيلم سينما، كانوا مجرد نموذج للبشر اللي بيعميهم الطمع، وبيفتكروا إن النعمة دايمة حتى لو داسوا على اللي ادهالهم. ركبت عربيتي، وبصيت من الشباك على طريق المطار والبيوت والناس.. وحسيت بنسمة هوا باردة ومريحة. الرحلة كانت طويلة وصعبة، بس في النهاية، كل واحد قعد في المكان اللي يستاهله.. والعدالة كُتبت بآخر سطر في الحكاية.

مقالات ذات صلة

مرات ابني منعتني من الاحتفال معاهم حكايات صافي هاني

بعد اعلان طلاقي حكايات صافي هاني

بياعة الورد حكايات صافي هاني

حكاية بعد زواجي بشهر

حبست مراتي في المخزن حكايات صافي هاني

خيانه وزلزال مفاجي حكايات صافي هاني

اترك تعليقاً إلغاء الرد